الجمعة، 8 نوفمبر 2013

الدليل الحاسم للتأكد من أخبار باسم

القراء الأعزاء

 اعترافا مني بأننا معشر الصحفيين عالم ولاد تيت (الا من رحم ربي) وأننا احيانا نلجأ لكتابة الاحتمالات على أنها حقائق بسبب عدم التصريح بالحقيقة من صاحبها، اسمحوا لي أن اوفر لكم هذه النصائح للتأكد من الأخبار المنشورة بالتطبيق على نموذج أزمة باسم يوسف وقناة الرموز الوطنية (سي بي سي سابقا) .. ويمكن القول أن هناك طريقين من خلالهما تعرف هل الخبر يستحق البحث وراءه ونشره أم لا.

هنكمل بالعامية بقى، بالصلاة على النبي في طريق المنطق وطريق المصادر المذكورة في الخبر ... المنطق هناخد خبرين انتشروا بعد ساعات من منع الحلقة الثانية، الأول ان باسم خلاص وقع لام بي سي مصر، يعني يا مؤمنين هو في قناة كبيرة بتاخد توقيع اعلامي شهير وهو لسة مستمر في عقده مع القناة الاولانية، أنتو مش عارفين ان الجمع بين قناتين حرام شرعا، طب ام بي سي هتتكسف مثلا تطلع صورة لباسم وهو بيمضي، وهل ام بي سي  كانت مجهزة العقد على التوقيع عشان لو الحلقة اتمنعت، طيب لو مكنتش اتمنعت كانوا هيمضوا مع مين؟ حمادة سلطان؟ ....الخبر التاني : ان التلفزيون المصري هيذيع الحلقة، يا حبيبي إذا كان لجنة الخمسين سرية، وقناة صوت الشعب عليها تراب، وماسبيرو مش عارف يرجع برنامج توك شو زي البيت بيتك، تقوم فاكر أنه هياخد الحلقة الممنوعة، فاكره جرنال العربي الناصري لما كان بينشر المقالات الممنوعة في الأهرام ايام مبارك ؟ ... وحتى لو حصل هو مش في قناة ليها حقوق بث ؟ ولا فاكرينها الجزيرة يسرقوا منها الماتش بلطجة؟

 نيجي بقى للطريق التاني، طبعا الأزمة بين الطرفين معقدة جدا، والانفصال أقرب من الاستمرار، بس يا حبيبي فريق البرنامج طلع بيان، سي بي سي طلعت بيانين، وباسم بيكتب المؤكد على حسابه ع تويتر، يبق على أي اساس مصدر يقول أن العقد اتفسخ، ما هو لو حصل سي بي سي هتقول صح؟ ومصطفى كامل وفرقته هيغنوا ادام مبنى القناة تسلم الأيادي.....والبرنامج برضو هيقول عشان ساعتها يبق حر يتفاوض مع قناة تانية، وكون ان كلا الطرفين ملتزم الصمت دة مش معناه أن اي صحفي يكلم موظف في القناة يقول له "شكلهم كدة هيفسخوا العقد" فالخبر ينزل ان العقد اتفسخ ...لما يتفسخ العقد هيتم الاعلان رسميا..طب الديكور اتشال، الواجهة دي مش موجودة اصلا من قبل الموسم التالت ما يبدأ، والمسرح مؤجر بالكامل من الداخل لفريق باسم يعني لو عايز يقدم العرض بتاعه بتذكرة 500 جنيه هيقدم والتذاكر هتخلص .. ارجع كدة لصور مظاهرة تصوير الحلقة التانية هتلاقي ان الواجهة هي هي من ساعتها ... الخلاصة ان انتشار المواقع الاخبارية خلى البعض ينشر الاخبار دي عشان يعمل "هيتس" كتيرة بأقل مجهود، وفي ظل صمت الطرفين احيانا الصحفيين بيقولوا انا مش هنتظرهم لما يتكلموا ... فهمتوا ..فهمتوا خلاص ..مساء الفل. 

للتواصل مع الكاتب عبر تويتر twitter.com/MhmdAbdelRahman 

هناك تعليق واحد:

Unknown يقول...

كلام سليم ومنطقي 100%
بس ... اين باسم يوسف ، احمد اهم اعمدة ثورة او انقلاب 30/6 ؟؟؟؟؟؟؟؟؟